काठमाडौं– किरात समुदायको माैलिक परम्परा, मिथक, र मुन्दुमबाट प्रेरित नाटक ‘उम्लिँदो खरानी र लेम्लेम्मा’को मण्डला थिएटरमा मञ्चन गरिएको छ ।

बुधबारबाट सुरु भएको नेपाल अन्तर्राष्ट्रिय नाट्य महोत्सवमा उक्त नाटक मञ्चन गरिएको हो ।

रंगकर्मी विजय बरालको निर्माण अनि पशुपति राईको निर्देशनमा बनेको यो नाटकले समाजमा गहिरो रूपमा जरा गाडेका संस्कार, पितृसत्तात्मक सोच, र मिथकीय विश्वासहरूको कथा समेटेको छ ।

सामान्य निम्न वर्गीय समाज र परिवारको परिवेशमा बनेको यस नाटकमा, मिथक जब वास्तविकतामा परिणत हुन्छ, तब समाजले कसरी त्यसलाई व्याख्या गर्छ भन्ने विषय उठाइएको छ ।

मिल्सन राईको लेखन रहेको नाटकमा ठिन्ले ल्हामो, प्रायदीप राई, प्रयास बान्तवा राई, दिग्गज खत्री, रिन्छेन कुन्छोक मोक्तान, युवाहाङ राई, रोशनी स्याङ्‌बो, बलबहादुर राई (बलु) र रमिला मोक्तानले अभिनय गरेका छन्।

महोत्सवमा नेपाल सहित १२ देशका १७ वटा नाटक मञ्चन हुने छन् ।

महोत्सवमा छनौटमा परेका नाटकहरूमा नेपालबाट ‘झोडा’ र ‘सामा चाको सामा चाको अहिवा हे’, जापान र नेपालको ‘कन्दाता एन्ड शकुन्तला’, भारतको ‘एबओर्जिनल क्राइ’ र  ‘तमासा’, चीनको ‘मोचौ मोचौ’, ट्युनिसियाको ‘एसेच’, इरानको‘‘एन्टिगोन’, लिुथआना र स्पेनको ‘अराइभ्ड’, चीनको ‘चार्मिङ जिन्जु ओपेर एपिसोड्स’ छन् ।

‘सामाजिक रूपान्तरणका लागि रङ्गमञ्च  रैथाने ज्ञानको उज्यालो’ नारासहित सुरु भएको महोत्सव चैत १२ गते सम्म चल्ने छ ।