काठमाडौं- ऊर्जा जलस्रोत तथा सिँचाइमन्त्री दीपक खड्काले साँझको समय घरमै पनि लोडसेडिङ हुने अवस्था रहेको बताएका छन् ।

बुधबार राष्ट्रियसभा बैठकमा सांसदहरूले राखेका प्रश्नको जवाफ दिँदै मन्त्री खड्काले अहिले ८३० मेगावाट विद्युत् भारतबाट आयात भइरहेको खुलाए ।

मुलुकभित्रको उत्पादन करिव एक हजार मेगावाट रहेकाले साँझको समय घरमै पनि लोडसेडिङ हुने अवस्था देखिएको दाबी उनले गरेका हुन् ।

मन्त्री खड्काले यसअघि लोडसेडिङको औपचारिक अन्त्य भए पनि उद्योगमा विदुयत् कटौती रहेको बताए ।

भारतबाट विद्युत् आयात गरेर धान्न सक्ने अवस्था अब नरहेको पनि खड्काले दाबी गरेका छन्।

मन्त्री खड्काले वर्षायाममा उत्पादित ३५ सय मेगावाटमध्ये विधुत् प्राधिकरणले ७ सय मेगावाट विद्युत् मात्रै उत्पादन गरेको बताए । बाँकी सबै विद्युत् निजी क्षेत्रले उत्पादन गरिरहेको पनि उनले जिकिर गरे ।

निजी क्षेत्रको उत्पादन र भारतबाट आयात गरिएकाले लोडसेडिङ हटेको जस्तो देखिएको बताउँदै उनले ‘उज्यालो नेपालको नायक’ कुलमान घिसिङ नभएको तर्क गरे ।

कुलमानले सार्वजनिक गरेको प्राधिकरणको नाफा पनि सत्यतामा आधारित नरहेको जिकिर मन्त्री खड्काले गरेका छन् ।

चमेलिया जलविद्युत् आयोजनामा काम गरेको पैसा नतिरेका कारण विद्युत् प्राधिकरणको बैंक खाता रोक्का भएको उनले बताए ।

बैंक खाता रोक्का हुँदा पनि मन्त्रालयलाई कुनै जानकारी नआएकाले आफूले आवश्यक कागजात माग गरेको खड्काले जिकिर गरेका छन् ।