काठमाडौं– संघीय राजधानी काठमाडौं भित्रिने र बाहिरिने सार्वजनिक सवारी साधनहरूका लागि नागढुंगा सिस्नेखोला सुरुङमार्गले सहज हुने भएको छ । अहिले बलम्बुमा सुरूङमार्गसँग जोडिने फ्लाई ओभरले अन्तिम रुप पाउँदैछ

नागढुङ्गा–थानकोट सडकखण्डमा घण्टौँसम्म जाममा पर्ने समस्या समाधानका लागि सुरुङ मार्गको निर्माण गरिएको हो । 

यो सुरुङमार्गको आपातकालीन र मुख्य सुरुङ ब्रेक थ्रु भइसके पनि हाल त्यस क्षेत्रका स्थानीयहरूले विभिन्न माग राख्दै निर्माण सम्पन्न गर्न नदिन अवरोध गरिरहेका छन् ।
   
यो आयोजनामा तीनवटा अन्डरपास, चारवटा बक्स कल्भर्ट, एउटा ओभरपास, तीनवटा पुल (ब्रिज) र एउटा फ्लाइओभर छन् । बलम्बु क्षेत्रमा फ्लाइओभर निर्माणाधीन अवस्थामा छ ।

त्यस्तै, सुरुङभित्रको सडक ढलान, बत्ती जडान (लाइटिङ), अक्सिजन पाइप जडान (भेन्टिलेसन) लगायतका काम भइरहेको आयोजनाले जनाएको छ ।

यो सुरुङमार्ग बनाउन २०७६ असोज ६ गते जापानी कम्पनी हाज्मा-आन्दो र सरकारबीच सहमति भएको थियो । धादिङतर्फको जग्गा समस्या, स्थानीय अवरोध, कोरोना लगायतको कारण निर्माणमा ढिलाइ भएको थियो । 

तस्बिरहरू : नेपाल फोटो लाइब्रेरी