काठमाडौं – चलचित्र ‘रातो टीका निधारमा’ को शीर्ष गीत सार्वजनिक गरिएको छ । राजधानीमा एक कार्यक्रमको आयोजना गर्दै चलचित्रको गीत सार्वजनिक गरियो ।

चलचित्र ‘अल्लारे’ मा समावेश ‘रातो टीका निधारमा टलक्क टल्कियो’ बोलको गीतको रिमेक भर्सनमा शम्भुजीत बाँस्कोटाको संगीत निर्देशन रहेको छ भने प्रमोद खरेल र मेलिना राईको स्वर सुन्न सकिन्छ । ओर्जिनल गीतमा उमेश पाण्डे र रमना श्रेष्ठको स्वर सुन्न सकिन्छ । ‘अल्लारे’ मा महानायक राजेश हमाल र करिश्मा मानन्धरको अभिनय देख्न सकिन्छ । गीतका सर्जक सहदेव ढुंगाना हुन् ।

यस्तै ‘रातो टीका निधारमा’ मा समावेश गीतको भिडियोमा अंकित शर्मा र साम्राज्ञी राज्यलक्ष्मी शाहलाई शीर्ष भूमिकामा देख्न सकिन्छ । भिडियोमा रविन्द्र झा, नीता ढुंगाना, खुस्बु खड्का, बुद्धि तामाङ, शिवहरि पौडेल, बसुन्धरा पौडेल लगायतलाई समेत देख्न सकिन्छ ।

एए ग्रुप अफ कम्पनीको ब्यानरमा बनेको यो चलचित्रमा किरण शर्मा र कृति शर्माको लगानी रहेको छ । यस्तै चलचित्रमा शम्भुजीत बाँस्कोटा र कल्याण सिंहको संगीत, पुरुषोत्तम प्रधानको छायांकन, राजेश शाहको भीएफएक्स तथा मित्रदेव गुरुङको सम्पादन रहेको छ ।

यो चलचित्र दशैँको अवसर पारेर असोज १० गतेदेखि प्रदर्शनमा आउँदैछ ।