काठमाडौं – भारतीय सोसल मिडिया इन्फ्लुएन्सर ओरहान अवात्रामणि उर्फ ओरी साथीहरुसँगको मदिरा पार्टीले कानुनी संकटमा परेका छन् ।

उनी भारतको जम्मु कश्मिरस्थित वैण्णु देवी मन्दिर आसपासको निषेधित क्षेत्र मदिरा पार्टी गरेका कारण कानुनी उल्झनमा परेका हुन् ।

जम्मु कश्मिर प्रहरीले ओरी र उनका अन्य सात साथीविरुद्ध ‘कानुन उल्लङ्घन’को आरोपमा उजुरी दर्ता गरेको भारतीय मिडिया आजतकले उल्लेख गरेको छ ।

ओरीले मदिरा पार्टी गरेको तथ्य उनैले सार्वजनिक गरेको भिडियोबाट खुल्न आएको हो । ओरीले मार्च १५ मा मदिरा निषेधित क्षेत्रमा पार्टी गरेको भिडियो सामाजिक सञ्जालमा राखेका थिए । उनी उक्त भिडियोका कारण आलोचित बनेका थिए ।

सोही भिडियोले ओरी प्रहरीको निसानामा परेका हुन् । धार्मिक हिसाबले मदिरा निषेधित गरिएको क्षेत्रमा पार्टी गरेका कारण उनलाई गिरफ्तारीको तयारी भइरहेको भारतीय प्रहरीको भनाइ छ ।

मदिरा र मांशाहारी खानेकुरा निषेधित क्षेत्र भएको पूर्व जानकारी दिइए पनि उनीहरुले वेवास्ता गरेको प्रहरीको दाबी छ ।

ओरी सामाजिक सञ्जालमा भाइरल भारतीय हुन् । उनी भारतका प्राय: सबै सेलिब्रिटीसँग फोटो खिच्ने क्रममा भाइरल भएका हुन् । उनी स्टारकिडसँगको दोस्तीले थप चर्चामा आएका हुन् ।