काठमाडौं– नायक महेश त्रिपाठी र नायिका सृष्टि श्रेष्ठ केन्द्रीय भूमिकामा रहेको फिल्म ‘११ः५५’ चैत ८ बाट प्रदर्शनमा आउँदैछ ।

केन्द्रीय चलचित्र जाँच समिति (सेन्सर बोर्ड)ले यस फिल्मको प्रदर्शनमा अनुमति दिइसकेको छ । तर, यो फिल्म सबै उमेर समूहका व्यक्तिले भने हेर्न नपाउने भएका छन् ।

सेन्सर बोर्डले ‘ए’ प्रमाण पत्र प्रदान गरेका कारण सबै उमेर समूहका दर्शकले फिल्म हेर्न नपाउने भएका हुन् । ‘ए’ को अर्थ ‘एडल्ट’ हुन्छ । अर्थात् यो १६ वर्षभन्दा माथि व्यक्ति मात्रै यो फिल्मको दर्शक बन्न पाउनेछन् ।

फिल्ममा हिंसात्मक दृश्य रहेका कारण सेन्सर बोर्डले उक्त प्रमाणपत्र दिएको हो । फिल्म निर्माण पक्षले हिंसात्मक दृश्य हटाउन भन्दा एडल्ड सर्टिफिकेट लिन तयार भएको पाइएको छ ।

एडल्ट प्रमाणपत्र लिँदा १६ वर्षभन्दा कम उमेरका दर्शक कटौती हुन्छन् । जसको असर बक्स अफिस कलेक्सनमा देखिन्छ । यो असर सहन निर्माण पक्ष तयार भएको पाइन्छ ।

यो फिल्म दुई घण्टा १७ मिनेट लामो बनेको छ ।

महेश र सृष्टिसहित यस फिल्ममा नायिका करिश्मा श्रेष्ठ र डेब्यू नायक सागर खनाल प्रमुख भूमिकामा छन् ।

यही फिल्मबाट केशव पाण्डेले निर्देशनमा डेब्यू गर्दैछन् । निर्देशक पाण्डे, एमएस अग्रज र शेखर ज्ञवाली मिलेर यो फिल्म लेखेका हुन् ।

विचित्र फिल्मस् र गुड जब आर्ट्सको ब्यानरमा निर्माण भएको यस फिल्मको निर्माता श्याम शर्मा र सरोजा शर्माको हुन् ।