काठमाडौं– बैंकहरू कर्जा प्रवाह बढाउन नसकेको तथ्यांकले देखाएको छ । नेपाल बैंकर्स संघको तथ्यांकअनुसार फागुन महिनामा वाणिज्य बैंकहरूको निक्षेप कर्जा अनुपात अर्थात् सीडी रेसियो नेपाल राष्ट्र बैंकले तोकेको सीमा भन्दा पनि धेरै तल ७९.२९ प्रतिशतमा सीमित रहेको देखिएको हो ।

नेपाल राष्ट्र बैंकले बैंकहरूको सीडी रेसियो ९० प्रतिशत तोकेपनि कुनैपनि वाणिज्य बैंकको अवस्था सो विन्दुमा पुग्न सकेको देखिँदैन । तथ्यांकअनुसार फागुन महिनामा सञ्चालनमा रहेकामध्ये ८ वटा वाणिज्य बैंकको सीडी रेसियो ८० प्रतिशत भन्दा तल रहेको छ भने अन्यको पनि ८६ प्रतिशत भन्दा नै तल रहेको छ ।

फागुन महिनाको तथ्यांकअनुसार राष्ट्रिय वाणिज्य बैंक कर्जा प्रवाहमा सबैभन्दा कमजोर देखिएको छ । सो अवधिसम्म राष्ट्रिय वाणिज्य बैंकको सीडी रेसियो ६३.८६ प्रतिशत कायम रहेको छ । त्यस्तै, कृषि विकास, ग्लोबल आइएमई, नेपाल बैंक, नेपाल इन्भेष्टमेन्ट मेगा, नेपाल एसबिआई, प्रभु र स्टान्डर्ड चार्टर्ड बैंकको सीडी रेसियो ८० प्रतिशत भन्दा तल रहेको छ ।

फागुन महिनामा वाणिज्य बैंकहरूमा ६० खर्ब ६३ अर्ब ४ करोड रुपैयाँ निक्षेप संकलन भएको थियो भने सो अवधिमा ४८ खर्ब ५० अर्ब ५९ करोड कर्जा प्रवाह गरेका थिए ।