काठमाडौं – फिलिपिन्सले चीनमाथि दुष्प्रचारको आरोप लगाएको छ । फिलिपिन्सले दक्षिण चीन सागरमा प्रदूषणका विषयमा चीनले दुष्प्रचार गरेको आरोप लगाएको हो ।

चिनियाँ राज्य सञ्चालित सञ्चार माध्यमले दक्षिण चीन सागरमा फिलिपिनी जहाजले जानाजान प्रदूषण गरिरहेको बताएपछि फिलिपिन्सले यस्तो प्रतिक्रिया दिएको हो । फिलिपिनी नौसेनाका रियर एडमिरल रोय भिन्सेन्ट ट्रिनिडाडले चिनियाँ कम्युनिष्ट पार्टीले फिलिपिन्सका बारेमा दुष्प्रचार गरेको आरोप लगाए ।

रेडियो फ्रि एशियाका अनुसार केही समयअघि चीनबाट प्रसारण हुने सीजीटीएन टेलिभिजनले दक्षिण चीन सागरस्थित सेकेण्ड थोमस शोलनजिकै रहेको बीआरपी सिएरा माद्रो जहाजबाट धुवाँको मुस्लो उडिरहेको देखाएको थियो ।

फिलिपिनी नौसैनिकले त्यहाँ फोहोर जलाएर प्रदूषण गरेको चिनियाँ आरोप छ । पछिल्लो समय दुई मुलुकबीच दक्षिण चीन सागरको विवाद उत्कर्षमा पुगेका बेला फिलिपिन्सले चीनमाथि यस्तो आरोप लगाएको हो ।