काठमाडौं- राष्ट्रिय जनमोर्चाका अध्यक्ष चित्रबहादुर केसीले पूर्वविशिष्टलाई आजीवन सुविधा दिनेगरी सरकारले ड्राफ्ट गरिरहेको कानुनको विरोध गरेका छन् ।

प्रतिनिधि सभाको आइतबार बसेको बैठकमा उनले सरकारको यस्तो कार्यलाई ‘स्याल बहुलाएको’ संज्ञा पनि दिए । पूर्वविशिष्टलाई सेवा सुविधा दिने कुरामा सरकार गम्भीर हुन जरुरी रहेको उनले बताए ।

‘मुलुकको यस्तो आर्थिक अवस्था देख्दादेख्दै, लाखौँ बेरोजगार युवा विदेशमा गल्लीगल्लीमा भौँतारिँदा भौँतारिँदै यस्तो बेला सरकारले पूर्वविशिष्टलाई सेवा सुविधा दिने व्यवस्था गर्न लागेको छ । यो के गरेको हो सरकारले ? स्याल बौलायो भने सहर पस्छ भन्ने नेपाली उखान छ । यस्तो बेला हो ? पूर्वविशिष्टहरूले दुःख पाउनु भएको छ ? उहाँहरुको सेवा सुविधा पुगेन ?’, उनले भने, ‘ ’यस्तो बेलामा पूर्व विशिष्टहरूलाई दिइने सेवा सुविधामा सरकार गम्भीर होस् । यतातिर नबढोस् । जनताको यत्रो आक्रोश सरकार र व्यवस्थाप्रति भइरहेको बेलामा यो कसले चलाउँछ सरकार ?’