काठमाडौं- सांसद डा.अमरेशकुमार सिंहले काठमाडौंस्थित निजामती अस्पतालको निर्देशकमा मेरिट लिस्टको १ नम्बरका प्रमोद यादवलाई विभेद गरिएको आरोप लगाएका छन् ।

लिस्टको १ नम्बरमा रहेका यादवलाई नियुक्ति नदिएर ३ नम्बरमा रहेकालाई नियुक्ति गरिएको भन्दै उनले आपत्ति जनाएका छन् ।

आइतबार प्रतिनिधि सभाको बैठकलाई सम्बोधन गर्दै उनले मधेसी समुदायको भएकै कारण यादवलाई सरकारले विभेद गरेको आरोप लगाए ।

‘भर्खरै निजामती अस्पतालको निर्देशकको नियुक्ति भएको छ । त्यहाँ पनि ३ नम्बरको मान्छेलाई नियुक्त गरियो । सिफारिस हुँदा मेरिट लिस्टको १ नम्बरमा प्रमोद यादव थिए’, उनले भने, ‘मधेशी भएका कारण त्यहाँ नियुक्ति भएन । सरकारले के बुझेको छ कि मधेशी, जनजाति, दलित, महिला भिख माग्न यो देशमा बसेका हुन् ?’

सरकारले पूर्वविशिष्टहरूलाई आजीवन सुविधा दिनेगरी ड्राफ्ट गरेको कानुनको उनले विरोध गरे ।

विशिष्टहरूले पदमा हुँदा पनि लुट्ने गरेको र विभिन्न काण्ड गराउने गरेको उनको आरोप छ । पदबाट बाहिरिइसकेपछि पनि जनतालाई ऋणको मारमा पारेर उनीहरुलाई सुविधा दिइन नहुने उनले बताए ।

‘पूर्वविशिष्टको सुविधाको कुरा छ । पदमा हुँदा लुट्ने, ठूला–ठूला काण्ड गर्ने, एनसेल काण्डदेखि लिएर वाइडवडी काण्ड गर्ने । रिटायर्ड भएर पनि जनताको लुट्ने ? त्यो मिल्दैन । जनता ऋणको मारमा जाने, पूर्वविशिष्टहरू पदमा जाँदा पनि लुट्ने, रिटायर्ड भएर पनि लुट्ने । यो बन्द हुनुपर्छ ।’