क्यानडा – अर्थशास्त्री मार्क कार्नीले क्यानडामा नयाँ प्रधानमन्त्रीको रूपमा सत्ता सम्हालेका छन् । शुक्रबारबाट शासन सुरु गरेका उनले कहिल्यै पनि क्यानडा अमेरिकाको अङ्ग नहुने बताए ।

अमेरिकी राष्ट्रपति डोनाल्ड ट्रम्पसँग क्यानडाको व्यापार युद्ध सुरु भएको अवस्थामा उनी लिबरल पार्टीको नेताको रूपमा सत्ता सम्हाल्न पुगेका हुन् ।

लिबरल पार्टीको निर्वाचनमा सफलता पाएपछि उनले ९ वर्षदेखि सत्ता चलाएका जस्टिन ट्रेडेउलाई विस्थापित गरेका हुन् । उनले अमेरिका र क्यानडा भिन्न देश भएकाले त्यो एउटै हुने कुनै सम्भावना नरहेको बताए ।

उनले अक्टोबर महिनामा हुने क्यानडामा आम निर्वाचन मार्फत बलियो म्यान्डेटको प्रतीक्षामा रहेको बताए । उनले पहिलो निर्णयको रूपमा विपक्षीले सबै भन्दा बढी आक्रमण गरेको विषयलाई सम्बोधन गरे । ट्रेडेउले वातावरणलाई ध्यानमा राख्दै ‘कन्जुमर कार्बन प्राइसिङ’ कार्यक्रम ल्याएका थिए । यसले मुद्रास्फीति बढाएको भन्दै त्यो कार्यक्रम अलोकप्रिय भएको थियो ।

अबको संसदीय निर्वाचनमा भने कार्नीको मुख्य प्रतिद्वन्द्वी कन्जरभेटिभ नेता पियरे पोलिभ्रे हुने छन् । यो करको घोषणा भन्दा अघि कन्जरभेटिभ पार्टी सर्वेक्षणमा २० प्रतिशतले अघि थियो । अहिले नजिकिएका छन् ।

पोलिभ्रले लिबरल पार्टी चौथो कार्यकालका लागि हकदार नभएको बताए । उनले आफू निर्वाचित भए सिधै अमेरिकी राष्ट्रपति ट्रम्पको मुकाबिला गर्ने बताउँछन् ।