काठमाडौं– चैत महिनामा सञ्चालनमा रहेका तीनवटा वाणिज्य बैंक बाहेक अन्य सबैको व्यक्तिगत मुद्दतीतर्फको ब्याजदर फागुन महिनाकै यथावत हुने भएको छ ।

वाणिज्य बैंकहरूले सार्वजनिक गरेको विवरणअनुसार नेपाल बैंक, लक्ष्मी सनराइज र हिमालयन बैंकले फागुन महिनाको तुलनामा चैत महिनाका लागि व्यक्तिगत मुद्दतीतर्फको ब्याजदर घटाएका हुन भने अन्य सबै बैंकले यथावत राखेका छन् ।

फागुन महिनामा नेपाल बैंकको व्यक्तिगत मुद्दतीतर्फको ब्याजदर ५.६ प्रतिशत रहेकोमा चैत महिनाका लागि ०.१ प्रतिशत घटाएर ५.५ प्रतिशत बनाएको छ ।

त्यस्तै, लक्ष्मी सनराइज बैंकले फागुन महिनामा कायम गरेको व्यक्तिगत मुद्दतीतर्फको ५.५ प्रतिशत ब्याजदरलाई घटाएर चैत महिनाका लागि ४.७५ प्रतिशत कायम गरेको छ । साथै, हिमालयन बैंकले फागुन महिनाको तुलनामा चैत महिनाका लागि ०.७५ प्रतिशतले ब्याजदर घटाएर ५.५ प्रतिशत कायम गरेको छ ।

अन्य सञ्चालनमा रहेका १७ वटा बैंकहरूले व्यक्तिगत मुद्दतीतर्फको ब्याजदर फागुन महिनामा कायम रहेको दरलाई नै निरन्तरता दिएका छन् । जसमध्ये व्यक्तिगत मुद्दतीतर्फ एनआईसी एशियाको ६.६, एनएमबीको ६.६, नेपाल इन्भेष्टमेन्ट मेगाको ६.५, प्राइम कमर्सियलको ६.२५, स्टान्डर्ड चाटर्डको ६.२५, प्रभुको ६.१, सानिमाको ६.०५ र एभरेष्टको ६ प्रतिशत रहेको छ ।

त्यस्तै, चैत महिनाका लागि माछापुच्छ्रे ६, राष्ट्रिय वाणिज्यको ६, सिद्धार्थको ६, ग्लोबल आइएमईको ६, कुमारीको ६.०१, नविलको ५.७५, सिटिजन्सको ५.६५, कृषि विकासको ५.५१ र नेपाल एसबिआईको ५.५ प्रतिशत व्यक्तिगत मुद्दतीतर्फको ब्याजदर तोकिएको छ । फागुन महिनामा बैंकहरूको व्यक्तिगत मुद्दतीतर्फको औसत ब्याजदर ६.०१ प्रतिशत रहेकोमा चैत महिनामा भने ५.९३ प्रतिशत कायम हुने भएको छ ।