मोरङ– विराट गोल्ड कप फुटबलको उपाधि ललितपुरको थ्री स्टार क्लबले जितेको छ ।

बुधबार साँझ विराटनगरको शहीद रङ्गशालामा भएको फाइनल खेलमा चर्च ब्वाइज युनाइटेडलाई २–० गोलले हराउँदै थ्री स्टारले उपाधि जितेको हो ।

विराट गोल्ड कप ट्रष्टद्वारा आयोजित रात्रिकालीन प्रतियोगितामा थ्री स्टारका खेमराज श्रेष्ठ र दीपेश घलेले एक–एक गोल गरेका थिए ।

प्रतियोगिताको विजेता टोली थ्री स्टारले नगद ११ लाख र उपविजेता चर्च ब्वाइज युनाइटेडले पाँच लाख रुपैयाँ पुरस्कार प्राप्त गरे ।

थ्री स्टारका खेलाडी खेमराज ‘बेस्ट प्लेयर अफ टुर्नामेन्ट’ घोषित भई ५१ हजार रुपैयाँ प्राप्त गरे । सोही टोलीका क्याप्टेन एकराज बुढाथोकीलाई ‘म्यान अफ प्लेयर’ वापत ११ हजार रुपैयाँ प्रदान गरिएको थियो ।

प्रतियोगितामा भारतका दुई र नेपालका विभागीयसहित १० वटा टोली सहभागी थिए  ।