काठमाडौं– नेपाली कांग्रेसका महामन्त्री गगनकुमार थापाले केपी शर्मा ओली नेतृत्वको वर्तमान सरकारले नचाहिने काममा हात हाल्न नहुने बताएका छन् ।

पछिल्लो समय नेपाल विद्युत् प्राधिकरणका प्रबन्ध निर्देशक कुलमान घिसिङलाई हटाउन सरकारले जोडबल गरेको सन्दर्भमा गगनले यस्तो बताएका हुन् ।

उनले प्रतिनिधि सभामा विशेष समय लिएर बोल्दै प्रबन्ध निर्देशक घिसिङको विषयमा सरकारले अनावश्यक हात हालेको संकेत गरेका हुन् । अन्य सांसदले घिसिङलाई अनावश्यक रुपमा चिढ्याएको बताएपछि थापाले पनि यस्तो सुझाव दिएका हुन् ।

नेपाली कांग्रेसबाटै ऊर्जामन्त्री रहेका दीपक खड्काले घिसिङलाई हटाउन सबै किसिमका उपाय लगाइरहेका बेला थापाले नचाहिने काममा हात नहाल्न भनेका हु्न् ।

घिसिङले गरेको काम नदेखेर सरकारले दु:ख दिने काम गरेको भन्दै अन्य सांसदहरूले प्रतिनिधि सभामा आवाज उठाएका थिए ।

‘सरकारको गल्ती छैन भन्दिनँ । तर सबै गल्ती यो सरकारले मात्र गरेको होइन’, उनले भने, ‘तर सरकारलाई म अनावश्यक काम नगर्न र नचाहिँदो काममा हात नहाल्न भन्छु । सरकार र सरकारमा रहेका मन्त्रीहरूले नचाहिने काम नगरेको राम्रो हुन्छ ।’ थापाले जसले जे बोले पनि तथ्याङ्क पल्टाएर हेर्न आग्रह पनि गरे ।