काठमाडौं- राष्ट्रिय स्वतन्त्र पार्टीका सभापति रवि लामिछाने उच्च अदालत पुगेका छन् ।

एक करोड धरौटी लिएर छाड्ने गरी गत माघ १३ गते रुपन्देही जिल्ला अदालतबाट भएको आदेशविरुद्ध रविले उच्च अदालत तुलसीपुरको बुटवल इजलासमा सोमबार निवेदन दर्ता गराएका छन् ।

बुटवलस्थित सुप्रिम सहकारी संस्थाको बचत अपचलनसँग सम्बन्धित मुद्दामा जिल्ला अदालत रुपन्देहीका न्यायाधीश प्रह्लाद योगीको इजलासले माघ १३ गते एक करोड रुपैयाँ धरौटी लिएर उनलाई थुनामुक्त गर्ने आदेश दिएको थियो।

तर गोर्खा मिडियामा उनका साझेदार एवम् पूर्वडीआईजी छविलाल जोशीलाई भने अदालतले पुर्पक्षका लागि थुनामा पठाइदिएको छ ।

फौजदारी कार्यविधिसंहिताको दफा ६८ बमोजिम धरौटी माग गरिएकोमा चित्त नबुझी त्यो बेरितको आदेश बदर गरी दफा ६९ बमोजिम साधारण तारेखमा बसी मुद्दा पुर्पक्ष गरी पाऊँ भनी लामिछानेले दफा ७३ बमोजिम उच्च अदालतमा निवेदन दिएका हुन् ।

लामिछाने त्यसअघि गत पुस २५ गते पोखराको सूर्यदर्शन सहकारी ठगी प्रकरणमा कास्की जिल्ला अदालतमा ६५ लाख र कालिमाटीको स्वर्णलक्ष्मी सहकारी ठगी प्रकरणमा माघ २ गते काठमाडौं जिल्ला अदालतमा ६० लाख धरौटी बुझाएर रिहा भएका थिए । ती दुवै अदालतमा प्रभु बैंकले ग्यारेन्टी बसिदिएपछि रवि रिहा भएका थिए ।