काठमाडौं- नेकपा एकीकृत समाजवादीका अध्यक्ष माधव कुमार नेपालले राजसंस्था इतिहास भइसकेकाले फर्केर आउने कुनै सम्भावना नरहेको बताएका छन् ।

शुक्रबार आफ्नो जन्मदिनका अवसरमा आफ्नै निवास कोटेश्वर बिरुवा रोप्दै अध्यक्ष नेपालले राजसंस्था फर्कने कुनै सम्भावना नरहेको बताए ।

देश विकास गर्ने चाहना भए चूनाव लडेर प्रधानमन्त्री बन्न पनि उनले पूर्वराजालाई सुझाएका छन्। उनले भूमाफियासँग मिलेर वर्तमान सरकारले भूमिसम्बन्धी अध्यादेश ल्याएको आरोप पनि लगाए ।

आफूले ल्याएको अध्यादेश फेल वा निष्क्रिय भए सरकारलाई नैतिक संकट पर्ने उनको भनाइ छ । अध्यक्ष नेपालले दलसम्बन्धी कानुन ल्याएर फुटाउने षडयन्त्रकारीहरूको अन्त्य हुने भन्दै आफ्नो पार्टी कुनै हालतमा नफुट्ने जिकिर गरे ।

रौतहटबाट पहिलोपटक अभियानका रूपमा सुरुवात गरिएको वृक्षारोपण अभियानलाई नेपालले ऐक्यवद्धता जनाएका छन्।