वाशिङ्टन – अमेरिकाले युक्रेनसँग इनटेलिजेन्स सेयरिङ (गुप्तचर साझेदारी)मा सहयोग नगर्ने निर्णय गरेको छ । यसअघि प्रदान गर्दै आएको यो साझेदारी बन्द गर्दै अमेरिकाले यो निर्णय सार्वजनिक गरेको हो ।

यसले रुससँगको युद्धमा युक्रेनलाई थप अप्ठेरो पर्न सक्ने जनाइएको छ । अमेरिकाले युक्रेनलाई गर्दै आएको सहयोग रोक्ने निर्णय गरेको दुई दिनपछि यो निर्णय भएको हो ।

युद्धको सुरुवात भएदेखि नै अमेरिकाले युक्रेनलाई इनटेलिजेन्स सहयोग गर्दै आएको थियो । सोही महत्त्वपूर्ण डेटाको आधारमा युक्रेनले आफूलाई धेरै स्थानमा क्षति हुनबाट बचाएको थियो । यो सहयोगकै कारण युक्रेनलाई रुसविरुद्ध आक्रमण गर्न समेत सहज भएको थियो ।

सिआइएका प्रमुख जोन रिटक्लिफले युक्रेनी गुप्तचरसँग सहकार्य रोकिएको कुरा स्वीकार गरेका छन् । अहिले युक्रेनलाई फेरि वार्तामा ल्याउन यो स्थगित गरिएको समाचारमा उल्लेख छ ।

गत शुक्रबार अमेरिकी राष्ट्रपति डोनाल्ड ट्रम्प र युक्रेनी राष्ट्रपति भोलोडोमिर जेलेन्स्कीबीच भएको वार्ता भनाभनमा टुगिंएपछि यसले दुई देशको सम्बन्धमा चिसोपन आएको छ ।