काठमाडौं – सुदीप भुपाल सिंहको निर्देशन रहेको फिल्म ‘श्री बुकुरो : द होम कलिङ’को दोस्रो टिजर सार्वजनिक भएको छ ।

निर्माण पक्षले बुधबार एक मिनेट ४६ सेकेन्ड लामो टिजर सार्वजनिक गरेको हो ।

टिजरमार्फत् फिल्मको कथाबारे जानकारी दिइएको छ । कलाकार लक्ष्मी गिरीको संवादले फिल्मले पारिवारिक कथा उठान गरेको बुझ्न सकिन्छ ।

उनले भन्छिन्, ‘मेरो नाम देवी । अहिले आमा भएकी छु । यो आमाको कथा हो । बाँकी आँसुको कथा हो । बाँकी हाँसोको कथा हो । बाँकी सम्झनाको कथा हो । बाँकी सपनाको कथा हो । बाँकी मायाको कथा हो । घरको कथाको हो, श्री बुकुरोको ।’

‘बुकुरो’को शब्दिक अर्थ ‘झुपडी’ हो । नाम र टिजरले फिल्मले एक झुपडीको भवनात्मक कथा भन्ने संकेत गरेको छ ।

फिल्ममा टिजरमा फिल्मका मुख्य कलाकार आशीर्वाद क्षेत्री, लक्ष्मी गिरी, निकिता आचार्य लगायतले स्थान पाएका छन् ।

फिल्ममा उनीहरुसहित प्रतिकराज आचार्य, रोशनी कार्की, राजन इशान, दीपिका थापा, लय संग्रौला, मोहन निरौलालगायतको अभिनय रहने बताइएको छ ।

सुदीप ७ वर्षपछि फिल्म निर्देशनमा फर्किएका हुन् । यस फिल्मको कथा उनी आफैँले लेखेका हुन् । उनले यसअघि फिल्म ‘माला’ र ‘रुद्रप्रिया’ निर्देशन गरेका थिए । यस फिल्मको छायाङ्कन मुस्ताङ, बाग्लुङ, कास्की, दमौली, मकवानपुर र काठमाडौंमा गरिएको हो ।

टिजरमा फिल्मको प्रदर्शन मितिबारे जानकारी दिइएको छैन । फिल्म रेञ्जको ब्यानरमा बनेको यस फिल्मको निर्माता रुवि सेन सिंह हुन् ।

हेर्नुहोस् टिजर :