काठमाडौं– कमल थापा नेतृत्वको राप्रपाका २२ जना नेताले एकैपटक पार्टी परित्यागको घोषणा गरेका छन् ।

पार्टी परित्याग गर्नेमा महामन्त्री जयन्त चन्दसहित १४ जना केन्द्रीय सदस्य र बाँकी ८ जना पार्टीका विभिन्न विभाग र निकायमा रहेकाहरु रहेको  महामन्त्री चन्दले दाबी गरे ।

विगतदेखि नै तीनवटै राप्रपा एक हुनुपर्ने बताउँदै आएका महामन्त्री चन्दले सो प्रयास सफल हुन नसकेपछि पार्टी परित्याग गरेको बताए ।

पार्टी परित्याग गर्नेमा महामन्त्री जयन्त चन्दसँगै भरत गिरी, दिनेश श्रेष्ठ, प्रह्लाद शाह, गोविन्द खनियाँ, भरत प्रसाद पाठक, सानुकाजी हेमा, चिरागमान सिंह कुँवर, रिता पोखरेल, सुन्दर खड्का, गणेश सिंह, बिन्दा गिरी, भरत बहादुर चन्द, गोपाल दाहाल, गणेश चन्द, मुकुन्द कार्की लगायत छन् ।

पार्टी परित्याग गरेकाहरु राप्रपा संयुक्तमा प्रवेश गर्ने तयारीमा रहेको बुझिएको छ । डा प्रकाशचन्द्र लोहनी नेतृत्वको तत्कालीन एकीकृत राप्रपा राष्ट्रवादी र पशुपति शमशेर राणा नेतृत्वको राप्रपा प्रजातान्त्रिकबीच एकता भएर राप्रपा संयुक्त बनेको हो ।