काठमाडौं– एन्टीबायोटिक औषधिको लेबलमा रातो धर्का (डलाइन) राख्ने व्यवस्था पालना गर्न औषधि उद्योगहरूलाई औषधि व्यवस्था विभागले निर्देशन दिएको छ ।

विभागले एक सूचना जारी गर्दे सबै किसिमको एन्टीबायोटिक औषधिमा रातो धर्का राख्ने व्यवस्थाको पालना गर्न निर्देशन दिएको हो । एन्टीबायोटिक (प्रति जैविक) औषधिहरूको अधिक प्रयोग, न्यून तथा अनावश्यक प्रयोगले उत्पन्न हुने प्रति जैविक प्रतिरोध एन्टीबायोटिक रेसिस्टेन्टलाई न्यूनीकरण गर्न एन्टीबायोटिक औषधिको प्याकिङ्गको लेबलमा रातो धर्का लगाउनुपर्ने अभ्यास रहेको विभागले जनाएको छ । 

यसअघि औषधि सल्लाहकार समितिको सिफारिसमा विभागले गत वर्ष भदौ ११ गते एन्टीबायोटिक औषधिको प्राइमरी र सेकेण्डरी प्याकिङ्गको लेबलमा धर्का राख्ने सूचना निकोलेको थियो । तर रातो धर्का सम्बन्धी व्यवस्था कम्पनी र उत्पादन अनुसार समान नरहेको विभागद्वारा जारी सूचनामा उल्लेख छ । आम उपभोक्तालाई पनि पहिचान गर्न असहज भएको गुनासो आएपछि विभागले पुनः सूचना जारी गरी उत्पादक तथा आयातकर्ता सबैलाई रातो धर्का राख्ने व्यवस्था पालना गर्न निर्देशन दिएको हो । 

एन्टीबायोटिक औषधिहरू चिकित्सकको सिफारिसमा मात्र बिक्री वितरण गर्न विभागले आग्रह गरेको छ । चिकित्सकको सिफारिस बिना उक्त औषधिहरू बिक्री वितरण गरेको पाइएमा कानून बमोजिम कारबाही समेत गरिने सूचनामा उल्लेख छ ।

 ‘यदी कसैले कानून बर्खिलाप चिकित्सकको सिफारिस बिना उक्त औषधिहरू बिक्री वितरण गरेको पाइएमा कानून बमोजिम कारबाही गरिने ब्यहोरा समेत यसै सूचना मार्फत जानकारी गराइन्छ ।’ सूचनामा भनिएको छ ।