सुर्खेत– नेकपा कम्युनिस्ट पार्टी (नेकपा) महासचिव नेत्रविक्रम चन्द ‘विप्लव’ले नेपालका नेताहरू भिखारी जस्तो विभिन्न देशसँग भिख मागिरहेको बताएका छन् । सोमबार सुर्खेतमा आयोजित पत्रकार सम्मेलनमा बोल्दै अरु देशसँग भिख माग्दा युक्रेनको जस्तो हालत हुने बताएका हुन् । 

यस्तै समयले अग्रगामी शक्तिहरू एक ठाउँमा उभिनुपर्ने अवस्था आएको उनले बताए ।

 ‘दलालहरूले युक्रेनको जस्तै हालत बनाउँछन्,’ उनले भने, ‘नेपाललाई हामीले रूपान्तरण गर्न सकिन्छ । त्यसमा लागि कम्युनिस्ट मुभमेन्टलाई एकता आवश्यक छ ।’

गफ चुट्ने नेताबाट रूपान्तरण सम्भव नभएको र विदेशीको भिख थापेर आदर्शवादी गफ दिँदैमा देश समृद्धि नहुने उनको भनाई थियो ।

 ‘अहिले देशको उत्पादनले दुई महिना खान पुग्दैन,’ उनले भने, ‘यस्तै तालले विदेशीको एजेन्ट बनाउनतर्फ अग्रसर गराउँछ ।’

साथै राजनीति गर्ने मान्छेले श्रम गर्नुहुँदैन भन्ने प्रवृत्तिको अन्त्य गरिने पनि उनले बताए ।

एक महिनादेखि कर्णालीमा रहेका विप्लवले जुम्लामा सात सय स्याउका विरुवा रोप्नुका साथै कालिकोटमा भेडा फार्म उद्घाटन गरेको बताए ।

 ‘जनताले पनि सहयोग गरेका छन्, धागो, कपडा उद्योगको विषयमा पनि कुरा भएको छ’ उनले भने।