काठमाडौं – नेपाली फिल्म इतिहासको सबैभन्ढी बढी व्यापार गर्ने ‘फिल्म पूर्णबहादुरको सारङ्गी’का निर्माता विनोद पौडेलले नयाँ फिल्म ‘अभिमन्यु’ निर्माणको घोषणा गरेका छन् ।

निर्माता पौडेलले आइतबार सामाजिक सञ्जालमार्फत नयाँ फिल्म निर्माण र त्यसको प्रदर्शन मिति साउन २४ गते तय भएको जानकारी दिएका हुन् ।

निर्माण पक्षका अनुसार यो हिन्दी र नेपाली भाषामा निर्माण हुने बताइएको छ ।

यस फिल्मका लागि कलाकारहरु चयन अझै बाँकी छ । निर्माता पौडेलका अनुसार फिल्ममा यस क्षेत्रका गुमनाम र नयाँ अनुहारलाई प्राथामिकतामा राखेर कलाकार चयन गरिनेछ ।

निर्माता पौडेलले फिल्मको थिम पोस्टर पनि सार्वजनिक गरेका छन् । पोस्टरमा च्रकव्यूह र उडिरहेको पैसालाई देख्न सकिन्छ । पोस्टरले पैसाको प्रलोभनमा चक्रव्यूहमा फसेर त्यहाँबाट उम्किन खोज्ने पात्रको कथामा फिल्म निर्माण हुने बुझ्न सकिन्छ ।

यद्यपि निर्माण पक्षले कथावस्तुबारे र छायाङ्कनबारे जानकारी दिएको छैन फिल्मको सुशान्त गौतमले निर्देशन गर्दैछन् ।

यस फिल्मका लेखक मुकेश खनाल हुन् । सेभेन सिज सिनेमाको प्रस्तुति बन्ने फिल्मका निर्माता पौडेल र गुञ्जन गिरी हुन् ।