काठमाडौं – स्पेनिस ला लिगाको शनिबार भएको खेलमा रियल म्याड्रिड रियल बेटिससँग पराजित भएको छ।

बेटिसको घरेलु मैदानमा भएको खेलको १० औँ मिनेटमा म्याड्रिडलाई ब्राहिम डियाज अग्रता दिलाएका थिए। खेलको सुरुवातमै डियाजले पाएको सहज अवसरलाई गोलमा परिणत गरेका थिए। तर अग्रता जोगाउन नसक्दा म्याड्रिड चुकेको हो।

म्याड्रिडले दुई राम्रा मौका गुमाए लगत्तै खेलको ३४ औँ मिनेटमा बेटिसका जोनी कारडोसोले बराबरी गोल फर्काए। पहिलो हाफा १-१ गोलको बराबरीमा सकिएको थियो।

दोस्रो हाफमा बेटिसले खेलको ५४ औँ मिनेटमा पाएको पेनाल्टीलाई सदुपयोग गर्यो। इस्ककोले पेनाल्टीलाई गोलमा परिणत गर्दै टिमलाई २-१ को अग्रता दिलाएका थिए। खेलमा यो पेनाल्टी गोल नै निर्णायक बनेको हो।

बेटिस आउनु अघि इस्ककोले नौ वर्ष रियल म्याड्रिडमा बिताएका थिए। यो पराजयसँगै रियल म्याड्रिड तेस्रो स्थानमा झरेको छ।