सिरहा– स्थानीय निर्वाचन ०७९ मा सिरहाको औरही नगरपालिका–४ मा नेपाली कांग्रेसकातर्फबाट वडाध्यक्षका प्रत्याशी गंगाराम यादवसहित एक सय बढी नेता–कार्यकर्ता नेकपा (माओवादी केन्द्र)मा प्रवेश गरेका छन् ।

‘जनतासँग माओवादी, तराई मधेस जागरण अभियान’का क्रममा औरही–४ इटाटारमा शनिबार आयोजित कार्यक्रममा अध्यक्ष पुष्पकमल दाहाल ‘प्रचण्ड’ले नवप्रवेशीलाई पार्टीमा स्वागत गरेका हुन् । 

गत स्थानीय निर्वाचनमा ४ नम्बर वडा माओवादी केन्द्रले जितेको थियो । कांग्रेस दोस्रो भएको थियो । माओवादी केन्द्र प्रवेश गरेका यादवले निर्वाचनमा ५२५ मत प्राप्त गरेका थिए । ४ नम्बर वडा यादव समुदायको बाहुल्यता भएको बस्तीमा पर्छ ।

कार्यक्रमलाई सम्बोधन गर्दै अध्यक्ष प्रचण्डले हुलाकी मार्ग केन्द्रित अभियानले दक्षिण नेपालको रुपरेखा फेर्न सहयोग गर्ने बताए । लामो समय अलपत्र परेको हुलाकी मार्ग अघि बढाउन आफूले ०७३ मा प्रधानमन्त्रीको रूपमा भारत भ्रमण गर्दा भारतीय प्रधानमन्त्री नरेन्द्र मोदीसँग छलफल गरी सहयोग सुचारु गरेपछि योजना अघि बढेको उनले बताए ।