काठमाडौं- राष्ट्रिय मुक्ति पार्टी नेपालका अध्यक्ष राजेन्द्र महतोले बहुल राष्ट्रिय चरित्रको देश बनाउन आन्दोलन र संघर्ष गर्ने बताएका छन् ।

यही सात सकिएको पार्टी केन्द्रीय कार्यसमिति बैठकका निर्णय सार्वजनिक गर्न बिहीबार काठमाडौंमा पत्रकार सम्मेलन गर्दै अध्यक्ष महतोले देशका शासकहरूमा एकल नश्लीय चरित्र देखापरेको महतोले बताए। उनले अब बहुल राष्ट्रिय चरित्रको देश बनाउन आन्दोलन र संघर्ष गर्ने बताएका छन् ।

आन्दोलनका लागि समान धारणा र बिचार मिल्ने पार्टी र संगठनहरूसँग बृहत मोर्चाबन्दी गर्ने निर्णय गरिएको उनले बताए ।

उनले कांग्रेस, एमाले र माओवादीका कारण देश असफलतर्फ उत्मुख रहेकाले देशलाई वैकल्पिक शक्ति आवश्यक रहेको धारणा राखे ।

अध्यक्ष महतोले देशमा विभिन्न स्थानमा देखिएका समस्या समाधान गर्नुको साटो राज्यले अध्यधिक दमन गरेर समूदायबीच नै विभाजन पैदा गर्न खोजेको तर्क गरे ।

पाथीभरा केबलकार निर्माणका क्रममा भएको विवादमा राज्यको दमन स्वीकार्य नभएको भन्दै महतोले सरकारको रवैयाविरुद्ध संघर्षमा आउन आह्वान गरे ।

बैठकले पार्टीका सबै केन्द्रीय सदस्यहरूलाई १५ दिनभित्र सम्पत्ति विवरण भरेर केन्द्रीय कार्यालयमा बुझाउन निर्देशन दिएको छ । चैत १ गतेदेखि वैशाख १५ गतेसम्म संगठन विस्तार अभियान सञ्चालन गर्ने निर्णय पनि बैठकबाट भएको भएको अध्यक्ष महतोले बताएका छन् ।