काठमाडौं– २०८१ सालको दण्डपाणि ‘नन्दकुमारी अर्ज्याल स्मृति राष्ट्रिय पुरस्कार’ मानव अधिकारवादी मोहना अन्सारीलाई प्रदान गरिने भएको छ । 

५० हजार राशिको उक्त पुरस्कार राष्ट्रिय महत्त्वका विषयमा योगदान पुर्‍याउने व्यक्तिलाई दिँदै आएको छ । 

दण्डपाणि अर्ज्याल स्मृति केन्द्रका अध्यक्ष वरिष्ठ ईश्वरचन्द्र बानियाको अध्यक्षतामा फागुन ११ गते बसेको कार्यसमितिको बैठकले सो निर्णय गरेको हो । 

वि.स. २०६२ सालमा स्थापित स्मृति केन्द्रले पुरस्कार दिँदै आएको छ । यही फागुन १७ गते शनिबार प्रज्ञा प्रतिष्ठानको हलमा पुस्तक विमोचन तथा संस्थाको साधारण सभाको भव्य कार्यक्रमको बीचमा उक्त पुरस्कार मोहना अन्सारीलाई अर्पण गरिने भएको महासचिव कपिलचन्द्र खनालले जानकारी दिए । 

गोरखामा वि.स. १९६३ मा जन्मिएका विद्वान् शिक्षा सेवी, इतिहास विज्ञ तथा समाजसेवी स्वर्गीय दण्डपाणि अर्ज्याल इतिहास ,ज्योतिष शास्त्र र संस्कृतिका अध्येता थिए । नन्दकुमारी उनकी धर्मपत्नी हुन् ।