काठमाडौं- प्रतिपक्षी नेकपा एकीकृत समाजवादी पार्टीले आफूलाई छुट्टै प्यालेस्टाइन राज्यको पक्षमा उभ्याएको छ ।

सोमबार केन्द्रीय कमिटी बैठकको निर्णय सार्वजनिक गर्दै महासचिव घनश्याम भुसालले पार्टी प्यालेस्टाइन राज्यको पक्षमा रहेको जानकारी दिए ।

उनले प्यालेस्टाइनमा गत वर्षदेखि इजरायलले नरसंहार मच्चाएको पनि उल्लेख गरेका छन् । ‘गत वर्षदेखि प्यालेस्टाइनको गाजा क्षेत्रमा इजरायलले चलाएको नरसंहारले विश्व जनमतलाई विचलित बनाएको छ’, समाजवादीले सार्वजनिक गरेको २० बुँदे निर्णयको १४ नम्बरमा भनिएको छ, ‘यो बैठक विश्व जनमत तथा संयुक्त राष्ट्रसंघको प्रस्तावअनुसार स्वतन्त्र प्यालेस्टाइनको पक्षमा अभिमत दोहोऱ्याउँदै त्यहाँका जनतामाथि गरिएको बर्बरतापूर्ण आक्रमणको विरुद्ध तथा स्वतन्त्र प्यालेस्टीनी राज्यको पक्षमा संसारभरी उठेको आवाजमा ऐक्यबद्धता जनाउँछ ।’

समाजवादीले गत वर्ष अक्टोबर ७ मा इजरायलबाट हमास विद्रोहीले कब्जामा लिएर बन्धक बनाएका नेपाली युवक विपिन जोशीको यथाशीघ्र रिहाई पनि माग गरेको छ ।

‘गत वर्षदेखि बन्धक रहेका नेपाली नागरिक विपिन जोशीको यथाशिघ्र रिहाईका लागि माग गर्दछ’, महासचिव भुसालले भनेका छन् ।

समाजवादीले नेपालीहरूले विदेशमा रहँदा राहदानीको म्याद समाप्त भएपछि सम्बन्धित देशमा रहेका नेपाली राजदूतावासबाट लिने प्रक्रियामा धेरै सकस भोग्नु परेको जनाएको छ ।

‘राहदानी अभावका नाममा खासगरी कामदार नेपालीहरूले जे जस्तो सास्ती र झन्झट बेहोर्नु परेको छ । यस समस्याको तत्काल समाधान गर्दै सम्बन्धित दूतावासबाट तुरुन्त राहदानी प्राप्त गर्न सक्ने व्यवस्था मिलाउन यो बैठक सरकारसँग जोडदार माग गर्दछ’, भुसालले भनेका छन् ।