काठमाडौं- महाशिवरात्रि नजिकिएसँगै भगवान् पशुपतिनाथको मन्दिर परिसरमा बाबाहरूको चहलपहल बढेको छ ।

छिमेकी मुलुक भारतसहित नेपालका विभिन्न ठाउँबाट नागा बाबाहरू काठमाडौं आउन थालेका छन् ।

नागा बाबाहरू जन्तीसहित काठमाडौँ आएर अन्नपूर्ण भण्डारबाट पशुपति मन्दिरको प्रवेशद्वार नम्बर १ हुँदै प्रवेश गरेका छन् ।

जोगीका चार सम्प्रदाय सन्न्यासी, वैष्णव, नानक र उदासीमध्ये नागाबाबा सन्न्यासीअन्तर्गत पर्छन् । महाशिवरात्रिको अवसरमा काठमाडौंस्थित विश्व सम्पदा सूचीमा समावेश पशुपति मन्दिरमा चार थरी सम्प्रदायका बाबाहरू आउने गर्छन् ।

महाशिवरात्रि पर्व नजिकिएसँगै पशुपतिनाथ मन्दिर परिसरका आवतजावत गर्ने भक्तजनको पनि संख्या बढिरहेको छ । पशुपति क्षेत्र विकास कोषले महाशिवरात्रिमा भक्तजनको चाप देखेर व्यावस्थापन तीव्रता पारेको छ ।

तस्बिरहरू : नेपाल फोटो लाइब्रेरी