काठमाडौं- राष्ट्रिय स्वतन्त्र पार्टी केन्द्रीय प्रशिक्षण विभागले केन्द्रीय समितिबाट स्वीकृत पाठ्यक्रम अनुसारको राजनीतिक प्रशिक्षण कार्यक्रम शुक्रबारदेखि सुरु गरेको छ ।

स्वीकृत पाठ्यक्रमको पहिलो प्रशिक्षण केन्द्रीय कार्यालय वनस्थली काठमाडौंमा आयोजना भइरहेको छ । प्रशिक्षणमा केन्द्रीय समिति सदस्यलाई सहभागी गराइएको छ ।

यो कार्यक्रम आज र भोलि गरि दुई दिन चल्दैछ । बिहानको पहिलो सत्रमा पार्टी कार्यवाहक सभापति डोल प्रसाद अर्यालले प्रशिक्षणको औचित्य र महत्त्वबारे बोले ।

उपसभापति डा. स्वर्णिम वाग्लेले प्रशिक्षणले संगठनलाई मजबुत गर्दै नेतृत्व विकासमा प्रभावकारी कदम हुने बताए ।

आगामी योजनाक्रममा केन्द्रीय तह, प्रदेश तह हुँदै जिल्ला र पालिकासम्म प्राथमिकतामा प्रशिक्षण तालिका रहेको उपसभापति डा. वाग्लेले बताए ।

यो प्रशिक्षण भोलि पनि नियमित सञ्चालन हुनेछ । राजनीतिक प्रशिक्षण कार्यक्रम केन्द्र हुँदै प्रदेश, जिल्ला, पालिका र वडासम्म सञ्चालन हुने गरि तयारी गरिएको छ ।