काठमाडौं- नेकपा (एमाले) का सांसद सूर्यबहादुर थापा क्षेत्रीले पत्रकारहरूको प्रश्नबाट आजित भएको बताएका छन् ।

सोमबार प्रतिनिधि सभाको बैठकमा बोल्दै उनले पत्रकारहरूले परिचालित भएर जथाभावी प्रश्न गर्न थालेको भन्दै आपत्ति जनाएका हुन् ।

उनले मर्यादा, सामाजिक शिष्टाचार, कानुन र संविधान पनि ख्याल नगरी पत्रकारले प्रश्न गर्ने गरेको बताउँदै यसमा सरकारको ध्यानाकर्षण गराएका हुन् ।

आइतबार संसद् बैठकबाट निस्किने क्रममा पत्रकारहरूले प्रधानमन्त्रीलाई ‘तपाईं हिटलर हो’ भनेर प्रश्न गरेको बताए । उनले तिनै पत्रकारले आफूलाई ‘तपाईं हनुमान हो’ भनेर सोधिएको भन्दै आपत्ति जनाएका हुन् ।

‘कसैद्वारा परिचालित ढंगले आरोपित गर्नेगरी प्रश्न गर्न पाइन्छ कि पाइँदैन ? म आफैंले पनि भोगेको छु । हिजो सम्मानीय प्रधानमन्त्रीज्यूलाई लक्षित गरेर सोधिएको प्रश्नप्रति मेरो ध्यानाकार्षण भएको छ । प्रधानमन्त्रीज्यू प्रश्नोत्तर कार्यक्रमबाट बाहिरिँदा ‘तपाईं हिटलर हो’ भनेर प्रश्न गरियो’, उनले भने, ‘नेपालको संसद्ले बनाएको प्रधानमन्त्री हिटलर हुन्छ ? संसद् सचिवालयको अनुमतिले रिपोर्टिङमा आएका पत्रकारले कानुन, संविधान, आचारसंहिता, सामाजिक शिष्टाचारलाई ध्यान नदिई यस्ता गैरजिम्मेवार प्रश्न सोध्न मिल्छ कि मिल्दैन ?’

थापाले पत्रकारहरूलाई पत्रकार आचारसंहिताअनुसार नियमन गर्न पनि माग गरे ।‘संविधान, कानुन र पत्रकार आचारसंहिता बमोजिम व्यवस्थित गरियोस् भन्ने अनुरोध गर्न चाहन्छु’, उनले भने, ‘मलाई नै एकजना मिडियाकर्मीले बुम तेर्स्याएर तपाईं हनुमान हो ? भनेर सोध्नु भयो । सांसदहरूलाई यस्ता प्रश्न गर्न पाइन्छ कि पाइँदैन ? म यसमा ध्यानाकार्षण गराउन चाहन्छु ।’