झापा– नेकपा (माओवादी केन्द्र)ले जनता समाजवादी पार्टी (जसपा) नेपालका कोशी प्रदेश पूर्वअध्यक्ष प्रवीण चाम्लिङलाई पार्टीमा भित्र्याएको छ । 

झापाको दमकमा शनिबार आयोजित खबरदारी सभामा माओवादी केन्द्रले सामाजिक अभियान्तासमेत रहेका जसपा नेपालका नेता चाम्लिङलाई पार्टीमा भित्र्याएको हो ।  

खबरदारी सभामा चाम्लिङसँगै दमक नगरपालिकाका विभिन्न वडाबाट सयौँ नेता–कार्यकर्ताहरू माओवादी केन्द्रमा प्रवेश भएका अध्यक्ष पुष्कपमल दाहाल ‘प्रचण्ड’को सचिवालयले जनाएको छ ।  

सचिवालयका अनुसार पार्टी प्रवेश गर्नेहरूमा जसपा नेपालका दमक नगर समिति पूर्व अध्यक्ष खेम दाहाल, नेकपा एमाले झापाका पूर्व जिल्ला सदस्य मेघप्रसाद दाहाल, क्रान्तिकारी कम्युनिस्ट पार्टीका जिल्ला सदस्य गोविन्द भट्टराई, राप्रपाका इन्द्रबहादुर तामाङ, कांग्रेसका राजेश ठकुरी, रास्वपाका प्रेमप्रसाद दाहालसहित विभिन्न तहका सयौँ नेता–कार्यकर्ताहरू माओवादी केन्द्र प्रवेश गरेका छन् । 

दमन नगरपालिका वडा नम्बर ४ बाट मात्रै १२९ जना माओवादी केन्द्रमा प्रवेश गरेको पार्टीको नगर समितिले दाबी गरेको छ । अन्य पार्टी परित्याग गरेर आएकाहरूलाई अध्यक्ष प्रचण्डले पार्टी प्रवेश गराएका थिए ।