पोखरा– सहारा क्लब पोखराले आयोजना गरेको आहारारा पोखरा गोल्ड कपको २४औँ संस्करण शनिबार समापन हुँदै छ। फाइनलमा नेपाल पुलिस क्लब र उज्वेकिस्तानको ब्ल्याक बुल्स एफसी आमनेसामने हुनेछन्।

बुधबारसम्म प्रतियोगिताका खेल संख्या २५१ पुगेको छ, जुन मोफसलका प्रतियोगितामध्ये सर्वाधिक हो। सहारा क्लबले २०५८ सालमा क्याराभान गोल्ड कपका रूपमा प्रतियोगिता सुरु गरेको थियो।

मनाङ मर्स्याङ्दी क्लबले १२ पटक फाइनल खेलेको इतिहास भए पनि पुलिस ११औँ पटक फाइनल पुगेको छ। यदि पुलिसले जितेमा ७ पटक उपाधि जित्ने पहिलो टिम बन्नेछ। ब्ल्याक बुल्सले जितेमा पहिलो सहभागितामै उपाधि जित्ने नयाँ क्लब हुनेछ।

शुक्रबार आयोजित पत्रकार सम्मेलनमा दुवै टोलीका प्रशिक्षक र कप्तानले उपाधि जित्ने आत्मविश्वास व्यक्त गरे। ब्ल्याक बुल्सका प्रशिक्षक अब्दुलाजिजले पुलिसको खेल शैली विश्लेषण गरेर योजना बनाएको बताए। पुलिसका प्रशिक्षक चेतन घिमिरेले आफ्ना युवा खेलाडीलाई विश्वास रहेको उल्लेख गरे।

शनिबार दिउँसो २ बजे हुने फाइनल खेलको विजेताले १२ लाख १ हजार रुपैयाँ पाउनेछ भने उपविजेताले ६ लाख १ हजार रुपैयाँ प्राप्त गर्नेछ। उत्कृष्ट खेलाडीले स्कुटर जित्नेछ भने अन्य उत्कृष्ट खेलाडीहरूलाई जनही २५ हजार नगद पुरस्कार दिइनेछ।