काठमाडौं– भ्यालेन्टाइन अर्थात् प्रणय दिवसका दिन शुक्रबार धेरै युवायुवती आफ्ना प्रेमी तथा जोडीसँग रमाउन व्यस्त थिए ।

कतिपय शुक्रबार प्रेम प्रस्ताव राख्न पनि व्यस्त भए । तर यही दिन केही युवाहरू भने फरक शैलीमा प्रेम दिवस मनाउन जुटे।

लियो क्लब अफ काठमाडौं निर्वणाका युवाहरूको समूहले पशुपतिनाथ परिसरस्थित वृद्धाश्रममा वृद्धवृद्धाको सेवा गरेको छ।

लियो क्लब अफ काठमाडौंका सदस्यहरूले वृद्धावृद्धाको हेरचाह गरेर माया साटासाट गरेका हुन्।

लियो क्लब अफ काठमाडौं निर्वणाको आयोजनामा आश्रममा सरसफाइ गरिएको छ। यसैगरी युवाहरूले वृद्धहरूको दाह्री र कपाल काटेर नुहाइदिएका छन्।

कार्यक्रमका संयोजक राजन खनालले प्रणय दिवसमा फूल साटासाट, डेटिङ, डिस्को र क्याफेमा रमाउनुको साटो सामाजिक भावले वृद्धवृद्धाको सेवा गरिएको बताए ।