काठमाडौं- एकजना किशोरीलाई घरेलु कामदार बनाई बालबालिकाविरुद्धको कसुर लागेकी नेकपा एमालेकी प्रदेश सांसद रेखा शर्मालाई मुद्दा नचलाउने निर्णयपछि काठमाडौं महानगरपालिकाका मेयर बालेन्द्र साले ‘बालेन’ले विरोध जनाएका छन् ।

एमालेकी लुम्बिनी प्रदेश सांसद शर्माविरुद्ध सरकारले मुद्दा नचलाउने निर्णय गरेपछि बालेनले सामाजिक सञ्जालमार्फत् ती किशोरीलाई सम्बोधन गर्दै कु-कर्म गर्नेलाई तह लगाउन समय आउने बताए । उनले ती किशोरीसँग फेसबुकमै ‘सरी नानु’ भनेर माफ पनि मागेका छन् ।

‘यस्तै विभेद, अपराध मास्न अनि ती कुकर्म गर्नेहरूलाई तह लगाउन तिमी र तिमी जस्तै धेरै नानीबाबुले पढ्न पर्छ’, उनले भनेका छन्, ‘समाज बुझ्नु पर्छ । तिम्रा पीडककाविरूद्ध मुद्दा नचल्ने बनाएछ सरकारले । नआत्तिनु, समय आउनेछ ।’

जिल्ला सरकारी वकिलको कार्यालय काठमाडौंले २०८१ माघ १ गते नै शर्माविरुद्ध मुद्दा नचलाउने निर्णय गरेको थियो ।

दाङबाट निर्वाचित प्रदेश सांसद शर्माले १४ वर्षीया किशोरीलाई ८ वर्षदेखि घरेलु कामदारका रूपमा राख्दै आएकी थिइन् । ती किशोरीलाई यातना दिइएको जानकारी पाएपछि काठमाडौं महानगरले उद्धार गरेको थियो ।