काठमाडौं- नेपाल समाजवादी पार्टी (नयाँशक्ति) का अध्यक्ष डा.बाबुराम भट्टराईले नेकपा (माओवादी केन्द्र) को मूल नेतृत्व भ्रष्टाचार, अनियमितता, शक्तिकेन्द्रहरूको दलाली र वर्ग उत्थानको दलदलमा फसिसकेको निष्कर्ष निकालेका छन् ।

आइतबार पार्टीको प्रथम महाधिवेशनमा पेश गरिएको राजनीतिक तथा संगठनात्मक प्रस्तावमा उनले बलिदानीपूर्ण जनयुद्धको जगमा बनेको माओवादीको मूल नेतृत्व भ्रष्टाचार, अनियमितता, शक्तिकेन्द्रहरूको दलाली र वर्ग–उत्थानको दलदलमा फसेकाले एमाले र यसमा भिन्नता नरहेको बताएका हुन् ।

भट्टराईले प्रतिवेदनमा भनेका छन्, ‘बलिदानीपूर्ण जनयुद्धको जगमा बनेको माकेको मूल नेतृत्व झन् तीव्र गतिमा भ्रष्टाचार, अनियमितता, शक्तिकेन्द्रहरूको दलाली र वर्ग–उत्थानीकरणको दलदलमा फसेको छ’, उनले भनेका छन्, ‘त्यसैले अब माओवादी र एमालेबीच कुनै तात्विक भिन्नता देखिँदैन।’

पटक–पटक सत्ताको नेतृत्व गरेर पनि माओवादी र एमालेले देशका गम्भीर संरचनात्मक समस्या समाधानको हल निकाल्न नसकेको भट्टराईले भनेका छन् ।

भनाइ र गराइमा कुनै तादात्म्य नरहनु, एमाले–माओवादीका नेता र उच्चतहका कार्यकर्ताहरू विभिन्न भ्रष्टाचार, अनियमिततामा मुछिनु आदिले जनताले कांग्रेस र कम्युनिस्टमा फरक नेदेखेको पनि बताएका छन् ।