काठमाडौं – फिल्म ‘दैव संजोग’मा समावेश चर्चित गीत ‘अच्छा लेकिन लण्डनको चिसोले समाउला’ फेरि दर्शकमाझ आउने भएको छ ।

नायक राजेश हमालको कमब्याक फिल्म ‘नरसिंहाः अवतार’मा यो गीत समावेश गरिने भएको हो । गीत रिमेक हुने भएको छ ।

पुरानो गीतमा संगीतकार तथा गायक शम्भुजित बाँस्कोटा र गायिका देविका बन्दनाको स्वर थियो । रिमेकमा भने शम्भुजित र गायिका रचना रिमालले स्वर रहनेछ ।

‘नरसिंहा : अवतार’का निर्देशक दिवाकार भट्टराईका अनुसार यो गीतको भिडियो १५ लाख रुपैयाँ खर्च गरेर तयार गरिएको हो । काठमाडौंको जरसिंपौवामा सेट निर्माण गरी चार दिन लगाएर छायाङ्कन सकिएको उनले बताए ।

गीतको भिडियोमा फिल्मका मुख्य कलाकारहरु राजेश हमाल, सरोज खनाल, राज कटुवाल, नीति शाह, उषा खड्गी र सनिषा भट्टराई लगायतले नृत्य गरेका छन् ।

नायक हमालले यो गीतले आफूलाई फेरि विगतमा फर्काएको भन्दै दर्शकले मन पराउने विश्वास व्यक्त गरे । गीतको भिडियोमा नायक हमाल र अर्का नायक कटुवाल कर्नेलको भूमिकामा छन् । यही फिल्मबाट नायक हमाल आठ वर्षपछि पर्दामा फर्कँदैछन् ।

यो फिल्ममा नायक हमाल र खनालले ३२ वर्षपछि सहकार्य गर्दैछन् । पूर्व मिस नेपाल उषा खड्गीको डेब्यू फिल्म हो ।