पोखरा – भारतको थन्डरबोल्ट नर्थ युनाइटेड क्लब २४ औं आहा रारा पोखरा गोल्डकपको क्वार्टर फाइनलमा पुगेको छ । शुक्रबार भएको चौथो प्रिक्वार्टर फाइनल खेलमा थन्डरबोल्टले संकटालाई ३–१ ले पराजित गर्दै क्वार्टरफाइनमा स्थान सुरक्षित गरेको हो ।

संकटाले खेलको १७ औं मिनेटमा मनिष पौडेलको गोलबाट अग्रता बनाए पनि ३५औँ मिनेटमा टालाले पेनाल्टीमा गोल गर्दै बराबरी गरे । दोस्रो हाफमा ७७औँ मिनेटमा करण राई र ८९औँ मिनेटमा आदर्श तामाङले गोल गर्दै थन्डरबोल्टलाई जित दिलाए ।

थन्डरबोल्टका प्रशिक्षक सोनाम छिरिङ भुटियाले योजना अनुसार खेल्दा सफलता मिलेको बताए । संकटाका प्रशिक्षक रवीन्द्र शिलाकारले खेलाडी अभावका कारण कमजोर प्रदर्शन भएको उल्लेख गरे ।

अब थन्डरबोल्टले क्वार्टर फाइनलमा माघ २९ गते उज्वेकिस्तानको ब्ल्याक बुल्स एफसीसँग खेल्नेछ । शनिबार पहिलो क्वार्टर फाइनलमा ब्रिगेड ब्वाइज क्लब क्लब युके र नेपाल पुलिस क्लबबीच प्रतिस्पर्धा हुनेछ ।