काठमाडौं– नेपाली कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानका सदस्य डा. कृष्णप्रसाद पौडेलले ०४६ पछि पार्टी बिग्रिँदै गएको बताएका छन् । 

प्रतिष्ठानले कास्कीको पोखरामा आयोजना गरेको दुईदिने अभिमुखीकरण कार्यक्रमको बन्दसत्रमा प्रस्तुत गरेको कार्यपत्रमार्फत उनले ०४६ पछि कांग्रेस बिग्रिँदै गएको बताएका हुन् । 

कांग्रेसले ७७ वटै जिल्लाका सभापति र जिल्ला प्रशिक्षण शाखा प्रमुखहरू (उपसभापति)का लागि संगठन र समसामयिक सन्दर्भमा दुईदिने अभिमुखीकरण आयोजना गरेको छ । अभिमुखीकरणको बन्दसत्रमा डा. पौडेलले ‘कांग्रेसको नेतृत्वमा भएका आर्थिक सामाजिक विकास’ विषयक कार्यपत्रमा पेस गरेका छन् । 

‘२०४६ सालसम्म : राजनीति त्याग, निष्ठा, आदर्श र समर्पण थियो । २०४६–२०५१ सम्म : सेवामा समर्पित रह्यो,’ कार्यपत्रमा लेखिएको छ, ‘२०५१ पछाडि राजनीति पेशा र व्यवसायमा परिणत भएको छ । अहिलेको राजनीतिमा त्याग, निष्ठा, आदर्श, समर्पण र सेवाभाव न्यून हुँदै गएको छ ।’ 

प्रतिष्ठानका सदस्य पौडेलले राजनीतिलाई सेवा भावमा नै समर्पित गर्न आवश्यक रहेकोमा पनि जोड दिएका छन् । जिल्ला सभापति र उपसभापतिहरूभन्दा अघि सोमबार कांग्रेसले ७ वटै प्रदेशका सभापतिहरूलाई पनि अभिमुखीकरण तालिम दिएको थियो ।