काठमाडौं- नेकपा माओवादी केन्द्रका सांसद सुदन किरातीले पार्टीभित्र प्रश्नको मृत्यु भएमा नेतृत्वको स्वेच्छाचारित बढ्ने बताएका छन् ।

ललितपुरमा सोमबार आयोजित एक कार्यक्रमलाई सम्बोधनका क्रममा उनले यस्तो बताएका हुन् ।

माओवादी केन्द्रीय सदस्यसमेत रहेका उनले अखिल क्रान्तिकारीको चुनावको सन्दर्भ कोट्याउँदै पार्टी विभाजनबारे चलाइएको हल्लालाई पनि अपवाह भनेका छन् । ती हल्लालाई गलत भन्दै उनले त्यसमा आपत्ति पनि जनाएका छन् ।

‘माओवादी पार्टी फुट्न पनि दिइने छैन, पार्टीभित्र प्रश्नको मृत्यु पनि हुन दिइने छैन’, उनले भने, ‘पार्टी फुटले सहिद, देश र जनतालाई धोका हुन्छ । पार्टीभित्र पश्नको मृत्यु भएमा स्वेच्छचारिता अझै बढ्दै जानेछ ।’

पूर्वपर्यटनमन्त्रीसमेत रहेका किरातीले इतिहासको अनुभवले पनि यस्ता दुवै प्रवृत्ति प्रवृत्तिलाई गद्धार र धोकेबाजका रुपमा ठहर गरिसकेको बताए ।

‘पार्टीमा स्वेच्छचारी नेतृत्वले सहिदको सपना पूरा गर्न सक्दैन । आजको देश र जनताको नेतृत्व पनि गर्न सक्दैन’, उनले भने, ‘त्यसैले दुवै प्रवृत्ति हामीलाई अस्वीकार्य हुन्छ । माओवादी फुट्दैछ भन्दै भट्टीमा बसेर हल्ला गर्ने पात्र र प्रवृत्तिहरू रक्सी खपत गरेर आफ्नै स्वास्थ्य बिगारिरहेको देख्दा दु:ख लाग्छ ।’

उनले प्रश्नबिनाको पार्टी र इन्धनबिनाको साधन दुवै गन्तव्यमा पुग्न नसक्ने पनि बताए । ‘आजका कार्यकर्ता यति कुरामा प्रष्ट हुनै पर्छ’, उनले भने, ‘तर प्रश्न यान्त्रिक, पूर्वग्राही र निरपेक्ष हुनु भएन ।’