काठमाडौं– इंग्लिस प्रिमियर लिग फुटबलमा आर्सनलले सानदार जित निकालेको छ । गएराति भएको खेलमा म्यानचेस्टर सिटीलाई ५–१ गोलले हराउँदै आर्सनलले सानदार जित निकालेको हो ।

आर्सनलका लागि मार्टिन ओडेगोर्ड, थोमस पार्टे, मेल्स लेविस स्केली, काई हार्भेट्ज, इथान नोनेरीले एक–एक गोल गरेका थिए । सिटीका लागि एर्लिङ हालान्डले गोल फर्काए ।

यो जितसँगै २४ खेलबाट ५० अंक जोडेको आर्सनल तालिकाको दोस्रो स्थानमा छ । पराजित भएको सिटी ४१ अंकका साथ चौथो स्थानमा छ । २३ खेल खेलेको लिभरपुल ५६ अंकसहित शीर्षस्थानमा छ ।

दोस्रो मिनेटमा नै कप्तान मार्टिन ओडेगार्डले काई हार्भाटेजको पासमा गोल गर्दै आर्सनललाई अग्रता दिलाएको खेलको ५५औँ मिनेटमा एर्लिङ हलान्डले सिटीका लागि बराबरी गोल गरेका थिए । त्यसको लगत्तै थोमस पार्टीले आर्सनललाई अग्रता दिलाएका हुन् ।

६२औँ मिनेटमा १८ वर्षीय मेल्स लेविस स्केलीले गोल गरे । १४ मिनेट बाँकी रहँदा हार्भाटेजले गोल थपे । १७ वर्षीय एथान नोनेरीले इन्जुरी समयमा डेकलन राइसको पासमा आर्सनलको लागि अर्को गोल गरे ।

यस्तै, आइतबार नै भएको अर्को खेलमा म्यानचेस्टर युनाइटेडले पनि पराजयको सामना गरेको छ । घरेलु मैदानमा भएको खेलमा युनाइटेड क्रिस्टल प्यालेससँग २–० गोलले पराजित भएको हो । क्रिस्टल प्यालेसका लागि दुवै गोल जियान फिलिप माटेटाले गोल गरेका थिए । पछिल्ला ६ सिजनमा ओल्ड ट्रायफोर्डमा क्रिस्टलको यो चौथो जित हो । टोटनहाम हट्सपरले पनि ब्रेन्टफोर्डलाई २–० गोलले नै हरायो ।