न्युयोर्क – अमेरिकी राष्ट्रपति डोनाल्ड ट्रम्पले वासिङ्टनको आकाशमा भएको अमेरिकी सैन्य हेलिकप्टर र कमर्सियल विमान दुर्घटनापछि डेमोक्र्याटमाथि आक्रोश पोखेका छन्।

दुर्घटनापछि उनले पूर्व डेमोक्र्याट राष्ट्रपति बाराक ओबामा र जो बाइडेनमाथि आक्रोश पोखेका हुन्। राष्ट्रपति ट्रम्पले ओबामा र बाइडेन कार्यकालमा नागरिक उड्डयन प्रशासनमा कम दक्ष कन्ट्रोलर नियुक्त गरेका कारण दुर्घटना भएको आरोप लगाएका हुन्।

बिहीबार ह्वाइट हाउसका पत्रकारको अगाडि बोल्ने क्रममा ट्रम्प लगायत सबै रिपप्लीकहरु डेमोक्र्याट प्रति आक्रामक थिए। डेमाक्र्याट कार्यकालमा अमेरिकालाई विभाजित गरेर शासन गर्न खोजिएको समेत उनले आरोप लगाएका छन्।

रिपब्लिक वक्ताले लगातार डाइभर्सिटी, इक्विलीटी र इन्क्लुसन कार्यक्रममाथि प्रहार गरे। ट्रम्पले बाइडेन प्रशासन र यातायातमन्त्री पिट बुटीजेगमाथि आक्रामक हुँदै प्रशासनलाई तल्लो तहमा लगेको आरोप लगाए।

बुटीजेगले भने ट्रम्पको अभिव्यक्तिलाई घृणा योग्य भनेका छन्। सिनेटका डेमोक्र्याट नेता चुक स्कुरमले पनि ट्रम्पको अभिव्यक्तिको आलोचना गरेका छन्।

अमेरिकाको वासिङ्टन डिसी नजिकै अमेरिकी एयरलाइन्सको विमान अमेरिकी सेनाको ‘ब्ल्याक हक’ हेलिकप्टरसँग ठोक्किएर भएको दुर्घटनामा २८ जनाको शव भेटिएको छ। ६० जना यात्रु र चार जना चालक दलका सदस्यसहित ६४ जना सवार विमानसँग सेनाको हेलिकप्टर ठोक्किएको हो।

दुर्घटनामा परेको मेरिकी सेनाको ब्ल्याक हक हेलिकप्टरमा अमेरिकी सेनाका तीन सैनिक सवार थिए।