धनगढी– कैलालीमा दुई किशोरीमाथि सामूहिक बलात्कारको आरोपमा २ जना पक्राउ परेका छन् । जोशीपुर गाउँपालिका– ६ बस्ने १५ वर्षीया किशोरीमाथि सामूहिक बलात्कार गरेको आरोपमा प्रहरीले दुई जनालाई पक्राउ गरेको हो ।

पक्राउ पर्नेमा जोशीपुर गाउँपालिका– १ का १८ वर्षीय सुमन डगौरा र  १८ वर्षकै कुशल चौधरी रहेको कैलालीका प्रहरी नायब उपरीक्षक (डीएसपी) कबिन्द्र सिंह बोहराले जानकारी दिए । उनीहरूलाई इलाका प्रहरी कार्यालय भजनीले नियन्त्रणमा लिएको हो । 

उनका अनुसार बलात्कारमा संलग्न रहेको आरोप लागेका अन्य दुई जना भने भारततर्फ भागेको बताइएको छ । भारत भाग्नेमा १८ वर्षीय राजकुमार चौधरी र १९ वर्षीय आशिक चौधरी छन् ।

उनीहरू चारै जनाले २२ मङ्सिरमा किशोरीमाथि सामूहिक बलात्कार गरे पनि ढिलो गरी प्रहरीलाई खबर आएको बुझिएको छ। किशोरी मामाघर जाने क्रममा किशोरीमाथि बीचबाटोमै बलात्कार भएको बताइएको छ ।

उनीहरू विरूद्व जबरजस्ती करणी शीर्षकमा किटानी जाहेरी दर्ता गरेर अनुसन्धान भइरहेको प्रहरीले जनाएको छ ।