काठमाडौं – अभिनेता प्रदीप खड्का स्टारर फिल्म ‘एक्टर : टेक वान’ माघ १६ बाट प्रदर्शनमा आउँदैछ । यतिखेर प्रदीप यही फिल्म प्रचारमा व्यस्त छन् ।

निर्माण पक्षले बिहीबार फिल्मबारे जानकारी दिन पत्रकार सम्मेलन डाकेको थियो । उक्त कार्यक्रममा प्रदीप, निर्देशक राजन भुसाल र अर्का कलाकार सुनील सिटौला उपस्थित थिए ।

प्रदीपले उक्त कार्यक्रममा आफ्नो नाम अगाडि ‘सुपरस्टार’ ट्याग राखेको विषय कोट्याए ।

‘एक्टर : टेक वान’को ट्रेलरमा प्रदीपको नामको अगाडि सुपरस्टारको ट्याग दिइएको छ । यो ट्यागको विषयमा पत्रकारहरूले प्रश्न नगरेपछि प्रदीप आफैँ प्रसंगमा प्रवेश गरे ।

निर्देशक भुसालको जिद्दीमा आफूले ‘सुपरस्टार’को ट्याग पाएको उनले शुरूमै स्पष्ट बताए । उनले भने, ‘निर्देशकले ट्याग राख्नेबारे सल्लाह गर्नुभएको थियो, तर मैले हुँदैन भनेको थिएँ । तर, मैले उहाँलाई रोक्न सकिनँ । उहाँले राख्ने नै निर्णय गर्नुभयो ।’

निर्देशक भुसालले पनि प्रदीपको भनाइमा सहमति जनाए । धेरै दर्शकले प्रदीपलाई सुपरस्टार भनेर सम्बोधन गरेको सुनेकाले आफूले सो ट्याग दिएको उनले तर्क गरे

भुसालको भनाइको सार थियो, ‘मैले प्रदीपसँग काम गरिरहँदा धेरैले सुपरस्टार ट्यागका साथ सम्बोधन गरेको पाएँ । कलाकारलाई ट्याग सरकारी निकायले दिने होइन, जनताले दिने हो । जनताले सुपरस्टार मानेको महसुस भएपछि ट्याग दिइएको हो ।’

फिल्मको नामअनुसार ट्याग दिइएको भए आफू अझ खुसी हुने प्रदीपको भनाइ थियो । उनले स्पष्ट पारे, ‘बलिउडमा जुन फिल्म खेल्यो – त्यसैको फुर्को जोड्ने चलन हुन्छ । जस्तो, सुल्तान फिल्म खेल्दा कलाकारको नाम अगाडि सुल्तान जोडिन्छ । मलाई पनि एक्टर प्रदीप भनेर ट्याग दिएको भए हुन्थ्यो ।’

यद्यपि; उनी ‘सुपरस्टार’ ट्याग र निर्देशकप्रति असन्तुष्ट भने छैनन् । ट्रेलर सार्वजनिकपछि भएका पत्रकार भेट, औपचारिक र अनौपचारिक कार्यक्रममा ‘सुपरस्टार ट्याग’बारे प्रश्न नउठ्नुको कारण प्रदीपलाई जान्ने इच्छा रहेछ ।

उनले प्रश्न गरे, ‘म विभिन्न कार्यक्रममा उपस्थित छु । सुपरस्टार ट्यागबारे प्रश्न नै आएको छैन । पत्रकारबाट प्रश्न नआउनेले कतै मलाई सुपरस्टार भनेर स्वीकार गरेको त होइन ?’

यद्यपि; यसरी निर्माण पक्षबाट नामको अगाडि ट्यागको पाउने उनी पहिलो नायक भने होइनन् । कतिपय निर्देशक र निर्माताले आफ्नो कलाकारलाई दिएको ट्यागबारे विवाद पनि हुने गरेछ ।

सुपरस्टारको ट्याग पाउने प्रदीप पहिलो नेपाली कलाकार पनि होइनन् । यो ट्याग अर्कैले पाइसकेको छन् ।

फिल्मी वृतमा नायक भुवन केसीलाई सुपरस्टारको ट्यागले सम्बोधन गर्ने गरिन्छ । पछिल्लो समय प्रदीप र भुवनको सम्बन्ध राम्रो छैन ।