काठमाडौं – साउदी अरबको जेलमा हाल १० हजारभन्दा धेरै पाकिस्तानी नागरिक रहेको खुलासा भएको छ । पाकिस्तानी उपप्रधान तथा विदेशमन्त्री इशक दारले संसदलाई यस्तो जानकारी दिएका हुन् ।

उनका अनुसार हाल साउदी अरबको जेलमा १० हजार २ सय ७९ जना पाकिस्तानी नागरिक रहेका छन् । उनले ५ सय ७० जना बन्दीलाई पाकिस्तान लैजान दिन साउदी अरब सहमत भएको पनि उल्लेख गरे ।

उनले हाल विश्वका विभिन्न मुलुकमा १९ हजार ९ सय ९७ जना पाकिस्तानी नागरिक जेलमा रहेको बताएका छन् । तीमध्ये विभिन्न १० मुलुकमा ६८ जना पाकिस्तानीलाई मृत्युदण्डको सजाय सुनाइएको छ ।

सबैभन्दा धेरै साउदी अरबमा, त्यसपछि क्रमशः यूएईमा ५ हजार २ सय ९२ जना, ग्रिसमा ५ सय ९८ जना, ओमनमा ५ सय ७८ जना, मलेशियामा ४ सय ६३ जना पाकिस्तानी नागरिक जेलमा रहेका छन् । यीमध्ये अधिकांश अवैध आप्रवासन, हत्या, मानव तस्करी, जबरजस्ती अशुलीजस्ता अभियोगमा पाकिस्तानी नागरिक जेलमा रहेको जनाइएको छ ।