काठमाडौं- नेकपा एकीकृत समाजवादीका अध्यक्ष माधव कुमार नेपालले अहिले सत्ताको दुरुपयोग भइरहेको बताएका छन् ।

बुधबार काठमाडौंमा बसेको समाजवादी मोर्चाको बैठकपछि सञ्चारकर्मीसँग कुरा गर्दै अध्यक्ष नेपालले सरकारले संविधान र संसदलाई उपेक्षा गर्ने काम गरिरहेको जिकिर गरे । उनले अहिले केपी शर्मा ओली नेतृत्वको सरकारबाट सत्ताको दुरुपयोग भइरहेको पनि बताएका छन् ।

संसदीय समितिमा विधेयकहरू रहेको अवस्थामा नियमविपरीत अध्यादेश ल्याउने काम भइरहेकाले खवरदारीका साथ दबाब दिनुपर्ने उनले बताएका छन् ।

अध्यक्ष नेपालले संसदीय समितिमा विचाराधीन विधेयक फिर्ता भएपछिमात्रै अध्यादेश ल्याउन मिल्ने जिकिर गरेका छन् । अध्यादेश ल्याउनै पर्ने भए सबै दलसँग छलफल गर्दा राम्रो हुने पनि उनको तर्क छ ।