काठमाडौं – चोटबाट फर्किएर मैदानमा उत्रेका कप्तान रिस जेम्सले इन्जुरी समयको पाँचौँ मिनेटमा बराबरी गोल गरेपछि चेल्सीले इङ्लिस प्रिमियर सिपको मंगलबार राति भएको खेलमा बोर्नमाउथसँग २-२ गोलको बराबरी गरेको छ।

विपक्षी गोलरक्षक मार्क ट्रेभर्सको गल्तीको फाइदा उठाउँदै १३ औँ मिनेटमा कोल पालमरले चेल्सीलाई अग्रता दिलाएका थिए। ५० औं मिनेटमा जस्टिन क्लुभर्टले पेनाल्टीलाई उपयोग गर्दै गोल गरे। ६८ औँ मिनेटमा सिमेन्याओको गोलमा भ्रमणकारी बोर्नमाउथले अग्रता लिएको थियो।

प्रिमियरसिपको अर्को खेलमा वेस्टहामले फलुहामलाई ३-२ ले हरायो। तालिकामा लिभरपुल २० खेलमा ४७ अङ्कसहित पहिलो स्थानमा छ। २१ खेलमा फरेस्टको ४१ तथा २० खेल मात्र खेलेको आर्सनलको ४० अङ्क छ। चेल्सी २१ खेलमा ३७ अङ्कसहित चौथो स्थानमा छ।

२० खेलमा न्यु क्याशलको ३५ अङ्क छ भने २१ खेलमा सिटीको पनि ३५ अङ्क छ। २१ खेलमा बोर्नमाउथको ३४ अङ्क छ।