काठमाडौं- नायक सलोन बस्नेत प्रस्तुतकर्ता रहेको फिल्म ‘रंगी’को पहिलो गीत ‘छ भने माया’ सार्वजनिक गरिएको छ ।

निर्माण पक्षले आइतबार न्युरोडमा एक कार्यक्रमको आयोजना गरी गायक आनन्द कार्की र गायिका सुजता केसीको स्वर रहेको गीत सार्वजनिक गरेको हो ।

यो गीतको शब्द र संगीत भने दुर्गेश थापाको हो ।

उक्त गीतमा फिल्ममा मुख्य कलाकार सलोन, नम्रता श्रेष्ठ, दिलीप रायमाझी, आयुषी ढकाल, विशाल पहारी र उत्तम केसीलाई स्थान दिइएको छ ।

कार्यक्रममा दुर्गेशले वरिष्ठ गायकसँग आनन्द कार्कीसँग सहकार्य गर्न पाएको खुशी व्यक्त गरे । त्यस्तै, गायक कार्कीले दुर्गेशसँग काम गर्ने इच्छा पूरा भएको सुनाए ।

गायिका सुजाता केसीले आफूलाई सुन्दर गीतमा स्वर दिने अवसर दिएकोमा निर्माणपक्षसँग आभार व्यक्त गरिन् ।

फिल्मका प्रस्तुतकर्ता सलोनले आफूलाई निकै मन परेको गीत सार्वजनिक गर्न पाएको पाएको खुशी व्यक्त गरे । भने, ‘म अष्ट्रेलियामा रहँदा यो गीत भर्चुअल सुनेको थिए । मलाई पहिलो पटक सुन्दै गीत मन परेको थियो । आज त्यही राम्रो गीत दर्शकसामु लैजाँदै छु ।’

रंगी फिल्मको प्रदर्शन मिति प्रणय दिवस लक्षित गरी अर्थात् फागुन २ लाई तोकिएको छ । यही फिल्मबाट सुरेश न्यौपानेले निर्देशनमा डेब्यू गर्दैछन् ।

सान्भी इन्टरटेनमेन्ट प्रालिको ब्यानरमा निर्माण भएको यस फिल्मको लेखक सुमन गजमेर हुन् ।