काठमाडौं- अमेरिकामा केही दिनदेखि सल्किरहेको आगोमा परेर मर्नेको सङ्ख्या बढ्दैछ । अमेरिकाको क्यालिफोर्निया राज्यमा अहिलेसम्म १६ जनाको ज्यान गइसकेको छ ।

११ जनाले इटनको आगोका कारण ज्यान गुमाएका हुन् भने ५ जनाले पालिसेडमा भएको आगलागीमा ज्यान गुमाएका हुन् ।

पालिसेडको आगो पूर्वतर्फ फैलिरहेको छ । यसै कारण ब्रेन्टफोर्डमा सतर्कता अपनाउन भनिएको छ ।

आइतबार बिहानै सान्टा आना हुरीका कारण स्थिति झनै तनावग्रस्त बनेको छ । लस एन्जलसको आगो निभ्नेतिर देखिए पनि हावा हुरीका कारण समस्या बढेको छ ।

अहिले लस एन्जलसमा अनधिकृत निजी ड्रोनह्ररू उडिरहेका छन् । यसले आउन सक्ने समस्यालाई मध्यनजर गर्दै सरकारले चेतावनी दिएको छ । २४ घण्टामा निषेधित क्षेत्रमा ३० वटासम्म अनधिकृत ड्रोन उडाइएको समाचारमा उल्लेख छ ।

आगोले मालिबु सहरको पूर्वतर्फको एकतिहाइ संरचना नास भएका छन् । मालिबुका मेयरका अनुसार पछिल्ला तीन महिनामा तीनवटा आगो आए पनि अहिलेको आगो बढी घातक र खतरनाक रहेको छ ।