काठमाडौं – प्रदर्शन मिति माघ २५ तोकिएको हरर थ्रिलर फिल्म ‘ममी’को नयाँ पोस्टर सार्वजनिक भएको छ । निर्माण पक्षले शुक्रबार नायिका प्रियङ्का कार्कीको चरित्र खुल्ने पोस्टर सार्वजनिक गरेको हो ।

पोस्टरमा प्रियङ्का निलो रङको पहिरनमा त्रसित मुद्रामा छिन् । उनको पृष्ठभूमिमा कालो बिरालो देख्न सकिन्छ । उनको पृष्ठभूमिको भित्तामा रगत लत्पत्तिएको फोटो फ्रेम छ । उक्त फोटोमा नायक सुलक्षण भारती, बालकलाकार आयुषी ढकाल र जेभिस श्रेष्ठ छन् ।

निर्माण पक्षका अनुसार नकारात्मकताको प्रतिकस्वरूप पोस्टरमा कालो बिरालो र रगत लत्पत्तिएको फ्रेम राखिएको हो । समर निरौला निर्देशित यस फिल्म हरर जनरामा निर्माण भएको छ । फिल्ममा प्रियङ्का, सुलक्षण र दिया मास्के मुख्य भूमिकामा रहेको बताइएको छ ।

सो ट्वान्टी फाइभको प्रस्तुतिमा निर्माण भएको यस फिल्मको लेखक निर्देशक समर र पूर्णिमा जोशी हुन् । फिल्ममा लोकराज जोशी र पूर्णिमा जोशीको लगानी रहेको छ ।