काठमाडौं-आगामी पुस २६ गते रिलिज हुने तय भएको चलचित्र ‘कार्साङ’ को प्रिमियर गरिएको छ । बुधबार साँझ काठमाडौंस्थित बिग मुभिजमा उक्त फिल्मको प्रिमियर भएको हो ।

प्रिमियरमा सिनेमाकर्मी र सञ्चारकर्मीको बाक्लो उपस्थिति थियो । कार्यक्रममा चलचित्र विकास बोर्डका अध्यक्ष दिनेश डिसी, निर्देशक दिपश्री निरौला, अनुप बराल, गायक कमल खत्री, मेलिना मैनालीलगायत कलाकार उपस्थित थिए ।

चलचित्रका मुख्य पात्र दयाहाङ राई कार्यब्यस्तताले उपस्थित हुन नसकेको कार्साङ निर्माण पक्षले जनाएको छ ।

चलचित्र ‘कार्साङ’ यम शेर्पाको डेब्यु निर्देशन हो । ‘कार्साङ’मा ग्रामीण परिवेशमा आधारित पारिवारिक कथा रहेको निर्देशक शेर्पाले बताए।

चलचित्रले गरिब, गरिबी र शेर्पा समुदायको सांस्कृतिक कथा प्रस्तुत गर्दैछ । निर्माण पक्षले यो फिल्मले दर्शकको मन जित्न र विश्वास जगाउन सफल हुने बताएका छन् ।

चलचित्र ‘कार्साङ’ मा मा दयाहाङ राई, सृजन निङ्लेखु, जितु नेपाल, दिया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन र सुरवीर पण्डितको अभिनय छ ।

यार्सा फिल्म्स र पुरुषोत्तम प्रधान फिल्म्सको प्रस्तुति रहेको यस चलचित्रका निर्माता तथा छायांकन पुरुषोत्तम प्रधान हुन् । सह-निर्माता गोविन्द बोहरा हुन् । कार्यकारी निर्माता रुपा आङ्छिरिङ शेर्पा छन् ।

तस्बिरहरू : नेपाल फोटो लाइब्रेरी